روابط قد تهمك :
اخبار التعليم | سلم رواتب المعلمين | المناهج التعليمية | مكتبة التحاضير والعروض | اسعار السيارات | حراج السيارات | عروض السيارات


النتائج 1 إلى 3 من 3

الموضوع: قصص حقيقية عن الجن من السعودية

  1. #1
    تربوي جديد
    تاريخ التسجيل
    Jan 2012
    المشاركات
    5
    معدل تقييم المستوى
    0

    قصص حقيقية عن الجن من السعودية



    السلام عليكم ورحمة الله
    الشهر عليكم مبارك ,, الله يجعلنا واياكم من صوامه وقوامه ويتقبل منا ومنكم صالح الاعمال .
    بدون مقدمات بدخل في صلب الموضوع واكتب لكم عن قصص حقيقية عن الجن رواها على مسامعي اصحابها أو احد ابناء اصحابها , وسوف ابدأ بماحدث مع زوج اختي في مدينة شقراء حيث كان حينها في المرحلة الثانوية ويلعب كرة القدم في حوش المنزل الواسع والمغطى بالرمل مع اخوته وابناء عمومته ايام الاجازة ( اجازة نهاية العام الدراسي ) لوقت متأخر من الليل حوالي الساعة الثانية فجرا وماهي الا لحظات وجاهم ابوهم يهوش عليهم ووقفهم عن اللعب وطفى لمبات الحوش وبعد صلاة الفجر جمع ابناءه من حوله واخبرهم بانه كان نائما بالامس وسمع صوت امرأه يقول له : اولادك ازعجونا نبي نناام وتكررت هذه العباره عليه مع وخزة في يده استيقظ بعدها وعلم بأن اولاده ازعجوا من كان عندهم من الجن .
    القصة الثانية حدثت في بيت جديد سكناه من سنوات تقريبا 1406هــ
    اول حدث :
    كنا مجتمعين اخواني واخواتي وامي في الصالة اللي في الدور العلوي قبل المغرب بقليل نتقهوى شاي ومعنا مكسرات فجأة سمعنا صوت خبطه قويه جدا بيننا كانه شي طايح من السماء اشبه بالانفجار , قمنا مفزوعين ماندري وش القصة طلعنا من الصالة ونزلنا تحت من الروعة ويوم تمالكنا اعصابنا طلعنا للسطح مالقينا شي ورجعنا للصالة مالقينا شي والدور الارضي مافيه شي ولكن سيبقى هذا الصوت الاشبه باالانفجار والذي كاد ان يفجر طبلة اذن كل واحد منا لغز محير للابد.

    ثاني حدث :
    عندنا في الدور العلوي اربعة اجنحة , كل جناح غرفتين ودورة مياه . اول جناح بعد الدرج مخيف جدااااا , اهلي كانوا طالعين واخوي طلع فوق يمشي بهداوة يقول : اسمع سواليف بنات وقربت اذني لباب الجناح الا صوت بنات يسولفن ويضحكن بشويش , يقول قلت اكيد اخواتي , وهو اللي يطق باب الجناح ويصوت فلانة فلانة ..... محد رد عليه واختفى الصوت .
    قلت في نفسي اكيد اخواتي يستهبلن علي وانا اللي افتح باب الجناح وادخل الغرفة الاولى مافيها احد وادخل الثانية مافيها احد !!!!!!!! طقتني ام الركب من الخوف ودريت وش القصة ووقتها ابي ادق ريوس واحط رجلي مع الدرج لكن رجليني مخشبة من الخوف وشوي وانا اللي ارفع ثوبي واحط رجلي برى البيت.
    ثالث حدث :
    بنت اختي تقول طلعت للجناح الثاني الرئيسي الخاص بجدتها بهدوء ومعي كتاب وانا اللي التفت على غرفة جدتي واشوف خالتي اللي كبري في العمر على سرير جدتي تناظرني وهي ساكته وانا اللي ابتسم لها ابيها تضحك بس ماضحكت وماهي الا لحظة غمضت عيني وفتحت واختفت بسم الله الرحمن الرحيم.
    رابع حدث :
    وحدة من اخواتي تقول قمت من النوم بعد المغرب والصالة العلوية مافيها احد يعني الدور العلوي هدووووووء فخفت وقلت اكيد امي واخواتي بالملحق اللي بالحوش وانا اللي انزل الدرج بكل سرعتي والف يسار عشان ادحل المطبخ واطلع منه على ملحق الحريم ... تقول ما امداني الف على المطبخ الا وصقعت رجال شاب شعره عراده المويه تقطر من راسه ويديه توه طالع من الحمام متوضي للصلاة.. تقول صقعته ومن قوة الصقعة رجعت على ورى وهو رجع وقال لي :
    بسم الله عليك واختفى .

    خامس حدث :
    امي في غرفتها تقول احس باحد يلمس خدي وانا نايمة وقلت في نفسي اكيد انه ابونا يمزح وانا اللي اطنشه ولا فتحت عيوني لكن استاقضت من النوم , وشوي وتتكرر نفس الحركة وانا اللي افتح عيوني واصوت للشايب وينك تعال ... ولا له حس !!!! قلت اكيد يمزح معي ومنلفز جنب السري او في دالوب من الدواليب وانا اللي اطل جنب السرير مافيه احد !!
    وافتح الدواليب مافيها احد ! طقتني النفاضة وسميت وتعوذت من الشيطان وشغلت القران في الغرفة.

    سادس حدث :
    اخوي الكبير مطوع ومسكت معه ذيك السنة يقرأ على اللي فيهم مس او سحر ولكنه ماعلمنا بشيء .
    امي كانت نايمة وابوي في عمله وحنا في مدارسنا فجأة انفتحت الستارة وبعدها انفتحت الدريشة بقوة . امي تقول صار عندي خبرة في هالامور قمت من النوم لكن مافتحت عيوني وجلست اسمي واتعوذ من الشيطان في نفسي ولكن نفس الوضع صوت الدريشة تنفتح وتسكر ومافتحت عويني ... شوي الا ولحافي انسحب مني بقوة !!!!! عقبها دريت ان الموضوع فيه شي كايد .
    وانا اللي اقوم واتعوذ من الشيطان بصوت عالي واقرى قران واشغل القران , ويوم جا شايبنا وولدي المطوع علمتهم وش صار لكن ولدي ابتسم وقال لاتخافين انا بعلمك وش السالفة ...
    اثر اخوي المطوع قرى على بنت مسحورة مدري ممسوسة جميلة جدا ولكن كل من خطبها نحاش بعد الخطبة يعني كان يصير للي يخطبها اشياء غريبة اللي يطفش ويهج لكن اخوي عرف موضوعها وقرى عليها وتشاوت كثير واعجب بها وقرر يخطبها وفاتحها وفاتح اهلها بالموضوع ولكنهم حذروه وقالوا بحوسونك الجن اللي معها قال اتحداهم وبطلعهم منها كلهم واحرقهم بقراءة القران . اتاريه خطبها ووافقوا عليه وبدى يقرى عليها قران عشان يطلع اللي فيها والجن اللي معها راحوا لامي على طول لعب بالستارة والدريشة واللحاف كتنبيه لها عن اللي يسوي ولدها.
    امي حلفت عليه يبطل قرايه على الناس ويكنسل موضوع الخطبة نهائيا.

    سابع حدث :
    ولد خال امي في قرية صغيرة من قرى شقراء اسمها الحريق وكان الولد تقريبا عمره 20
    وكان محافظ على الصلاة عدى صلاة الفجر وكان يقول كل ليلة قبل اذان الفجر بكم دقيقة اسمع صوت بنت لتغة تقول لي : عبدااللحمن قم الصلاة ويتكرر اللين افتح عيوني واقوم للصلاة
    صراحة ماخفت لان الصوت صوت بنت وحلو بعد وكنت احيانا اقوم من النوم ولا افتح عيوني وتستمر في مناداتي لصلاة الفجر ولكن لما اخبرت القصة لوالدتي وعما يحدث معي انقطع الصوت ولم اعد اسمعه ابداااااااااااااااااااااااااا للاسف الشديد شكلها زعلت مني



  2. #2
    تربوي جديد
    تاريخ التسجيل
    Jan 2012
    المشاركات
    5
    معدل تقييم المستوى
    0

    رد: قصص حقيقية عن الجن من السعودية

    hgp]القصة التالية حدثت منذ 90 سنة تقريبا في قرية الحريق التابعة لمحافظة شقراء
    كان واحد من الجماعة عصبي جدا يعني حااااار وكان اذا رجع فلاحته يبي غداه زاهب وقهوته .
    المهم المرة توها طالعه من النفاس باسبوعين ومشغولة بالمرة مع ولدها ونست تصلح الغدى
    دخل ولا لقى قهوة ولا غدى قام يرعد ويزبد وشاتها برجله على ظهرها وشهقت بقوة من الروعة والرجال سمع صوت رجال يقول : احسنت .
    كلها لحظات ووقفت المرة وجدعت الولد من يدها وضيعت ماعاد تعرف احد وطلعت من البيت بدون عباة وهو اختبص بالولد اللي طاح من امه وتعور بقوة وبالام اللي اهبلت ولا تعرف احد وصارت تكشف على الناس وتطلع من البيت وصار رجلها يصك عليها الغرفة وحط ولده عند اخته وجاب لها المطوع يقرا عليها اكثر من مرة بدون فايدة واستمر على هالوضع كم شهر ولا عاد قدر يتحمل هالوضع وتحسف على اللي سواه مع بنت عمه .
    وشار عليه واحد من الشيبان بشور غريب وقال له شف ياولدي رح لنخل فلان تالي الليل ( النخل هذا مشهور بوجود الجن فيه وهم جن مسلمين ) واستفزع بهم على هاللي داخل فيها ولا طلع , وفعلا دخل النخل نصف الليل ورفع صوته :
    تكفون يالمسلمين داخل على الله ثم عليكم تكفون تكفون , واحد من ربعكم دخل في زوجتي ولا طلع .
    خذ له خمس دقايق وهو يستفزع بهم ويبكي شوي الا وهو يسمع صوت يكلمه ويقول :
    عين خير يافلان وتوكل على ربك ان كان اللي فيها واحد من جماعتنا بنطلعه لكن ابي منك حاجة وحدة وتنفذها . قال الرجال ابشر وش تبي .
    قال الجني المسلم : رح وحطها بالغرفة الفلانية وسكر الباب ولاتفتحه ابد مهما استنجدت بك او صارخت بالك تدخل اياني واياك تفتح الباب وتدخل.
    قال الرجال ابشر , وفعلا رجع لبيته وطلعها من غرفتها وحطها بالغرفة الثانية وسكر الباب .
    يقول الرجال شوي الا اسمع صوت رجال يكلم زوجتي وش دخلك فيها يافلان ؟
    ورد ال الجني اللي في الحرمة وقال : اعشقها من زمان لكن ماقدرت ادخل فيها اللين روعها زوجها ودخلت.
    قال الجني المسلم له اطلع . ورد عليه الجني اللي بالحرمه بابيات شعرية عامية تعبر عن عشقه الشديد لها وللتراب الذي تسير عليه تناقلها فيما بعد اهل الحريق ولكني للاسف الشديد لا احفظها
    ورد الجني عليه المسلم بضربها وعلى صراخها وبدأ الزوج يسمع صراخ زوجته واستنجادها به وانها ستموت ان لم يفتح الباب ..... ولكنه لم يفتح الباب .... ثم بدأت الزوجة تطرق الباب بشدة وتصدر اصوات مرعبة والزوج يبكي بحرقة وماهي الا دقائق الا واختفى الصراخ وعم الهدوء المكان ثم سمع زوجنه تنادي عليه فلان فلان افتح الباب .
    فتح الباب وهو يبكي وحضنها بكلتا يديه وقبل رأسها وهي تسأله اين ولدي اين هو !!!!!
    اجابها بأنه بخير وأنه عند اخته . فسألته لماذا هو عند اختك وماذا يفعل هناك ؟
    فقال لها الا تذكرين ماحدث ؟
    قالت له : اللي اذكره ضربة قوية في ظهري وصوت رجال يقول : احسنت بس وبعدها بشوي الغرفة مسكرة وانت فتحت لي.
    قال لا يا فلانة لك كم شهر وانتي ماتعرفين احد ابد وماتبين ولدك ولا تبين ترضعينه ولاتعرفين احد ابد .
    طبعا ماصدقت اللي قاله لها .
    الشاهد ان الولد اللي ذبته امه يوم وقفت من الطيحه اثرت عليه وصار احدب طول عمره ومات تقريبا قبل كم سنه وعمره بين 85-90 ولها اولاد واحفاد الله يرحمه برحمته .

  3. #3
    تربوي جديد
    تاريخ التسجيل
    Jan 2012
    المشاركات
    5
    معدل تقييم المستوى
    0

    رد: قصص حقيقية عن الجن من السعودية

    القصة التالية قصها علينا الشيخ عبدالرحمن السدحان امام وخطيب جامع شقراء اطال الله في عمره وذكر لنا بأن رجلا من نجد شاب من القرية الفلانية تلبسه جني وانه اذا غضب يفقد السيطرة على نفسه ولا يعرف من حوله ويصبح ذا قوة خارقة , وأنه اضطر للذهب للشرقية ( قبل 150 سنة تقريبا والعلم عند الله ) هربا من الفقر وبيجرب حظه بحثا عن الرزق , وفعلا ركب احدى السفن طلبا للرزق , الشاهد ان النوخذه خذاهم لمكان بعيد بحثا عن اللؤلؤ وفعلا جلسوا لهم شهر يبجمعون اللؤلؤ من قاع البحر. وفي احدى الايام اعترضهم سفينة قراصنة ايرانية اصحاب بنية جسمانية قوية والتحموا بسفينتهم وصعدوا عليها ثم بدأت معركة بالاسلحة البيضاء للسيطرة على السفينة وفعلا سيطروا عليها وقاموا برمي ثلاثة من العرب الذين قاوموهم بشدة في عرض البحر ثم جاء الدور على صاحبنا امسك به اثنين من الايرانيون وبدأوا بضربه تمهيدا لقذفه في عرض البحر وماهي الا لحظات الا وفقد صوابه وتلبسه الجني اللي فيه وقام بطرحهم في عرض البحر وفر البقية من امامه لسفينتهم من شدة بأسه.
    النوخذه شكره على صنيعه واستغرب من قوته الهائلة وكيف انه يمسك بهم الواحد تلو الاخر ويرفعه في الهواء ثم يلقي به في عرض البحر وكانه ريشه , فاجاياه صاحبنا بأنه لايذكر شيئا مما حدث.
    وذكر شيخنا عبدالرحمن السدحان بأن هذا الشباب تلبسه جني وهو صغير وانه اذا غضب بشده يتلبسه الجني اللي فيه ويصبح قوي جدا واذا رجع لحالته الطبيعية واصبح هادي لا يذكر شيئا مماجرى.

معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 1 (0 من الأعضاء و 1 زائر)

المواضيع المتشابهه

  1. كارثة حقيقية
    بواسطة جواد ساهر في المنتدى منتدى حقوق المعلم والمعلمة
    مشاركات: 8
    آخر مشاركة: 08-06-2010, 17:32
  2. قصة حقيقية .. بس حلوه !
    بواسطة المسافر التميمي في المنتدى ميدان الترويح والترفيه
    مشاركات: 6
    آخر مشاركة: 13-08-2009, 16:32
  3. قصة حقيقية ..
    بواسطة ملكه الليل في المنتدى الساحة العامة
    مشاركات: 2
    آخر مشاركة: 22-07-2009, 05:15
  4. قصة حقيقية
    بواسطة مستواي ضايع في المنتدى منتدى حقوق المعلم والمعلمة
    مشاركات: 0
    آخر مشاركة: 08-02-2009, 02:17

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •