موضوع لذيذ || أجمل مآفي الآنثى مذااقهـآ.. وانآ خلآصة مذآق الآنثى ،،

[نـξـومـღ]

صباحكم ،؛، مسائكم رقه وموده الى الان جاري البحث عن الاصناف الجديده والاهم المذاق وسرعة الانجاز والسبب تشجيع ماما << امي تدعي لي كل يوم وانتوا عارفين ليه ..خخخخ وتقول يارب ماتفشليني عند حمولتك ويقولو عنك تربية مرايم اهم شي عندها اني ما أفشلها ابدا هههههههه اخترت مجموعه من الاصناف كل يوم او يومين اعمل تجربه صنفين الى ثلاثه اصناف و الي يعجبني وحلو اعمل عليه برنت واضعه في ملف خاص رز بالـصينيه ادري تقولون رز ما نبي بس أنا ما حبيت الرز إلا من هالطبخه .. ترا حوستها كثيره يلا نبدا نحوووووس بقول لكم كل خطوه نعملها خلوها على جنب أول شي نسوي رز ابيض ساده بالكميه اللي تكفيكم طبعا ماله داعي اعلمكم كيف نسوي الرز كلنا نعرف نعمله واللي ما تعرف تراسلني واحطه لها نقطع البطاطس والباذنجان مكعبات ونقليهم >> هنا تقدرون تحطون انواع ثانيه من الخضار بس احس كذا ok طريقه الدجاج فيليه 1 نقطع البصل والثوم بالكميه المطلوبه ونحمسه ونضيف الدجاج فيليه >> طبعا مقطعينه مكعبات نتبلهم ونظيف لهم مكعب ماجي + ليمون + فلفل بارد 2 نحط في الخلاط 3 طماطم وبعد الطحن نحطه في قدر ونظيف عليه : مكعب ماجي + كمون + بهارات + صلصه وإذا طبخ الطماط وتسبك نحط الدجاج عليه لين يتماسك ملاحظه : أنا ما حطيت ملح لأن الماجي يكفي والملح تحكموا فيه بالرز نجيب الصينيه ونحط طبقه بعدين نحط الدجاج كله في هالطبقه ثم نحط طبقه ثانيه من الرز ونحط فوقه الخضار ونكرر آخر طبقه تكون رز ونظيف فوق آخر طبقه خليط قشطتين مع 6 ملاعق كبيره مايونيز في هالمرحله حطوا العربجه على جنب وزعوا الخليط بشويش لأن بيتحرك الرز معكم نحط الصينيه بالفرن نولع النار اللي تحت لمدة 30 وبعدها اولع النار اللي فوق للتشقير مو تنسونها صـحن التقـديم وبكذا نكون خلصنا حوستنا شو رايكم اتمنى تعجبكم صنف اخر حلو ~ سلطـة العـدس الملونـهـ .. لذييييييييييييذه واسهل واغرب سلطه بالدنيا طعمها مره مميز وممكن تتصلح من بدري لانه كلما طولت بالتتبيله كلما كانت ألذ ~ المقاديـر ... عدس بني فلفل بارد ملون شبت متبل ايطالي جاهز وبس شفتوا مقادير اقل من كذا طبعا الكميه مو محدده على حسب رغبتك ،، ~ الطريقهـ ... اسلقي العدس البني بمويه وملح لغاية ماينضج ويلين وبعدها صفيه من المويه واتركيه يبرد ،،، قطعي الفلفل الملون شرائح وافرمي الشبت واخلطيهم سوا مع العدس ،،، صبي عليهم المتبل الايطالي وهذي صورته وقلبيهم مع بعض وذوقي اذا حبيتي ممكن تزيدينها عصرة ليمون وملح ،، وقدميها وبالعااااااااافيهـ ,,,,,,, حبايبي باقي لا احد يرد

[نـξـومـღ]

~ سلطـة طبقـات المكـرونـهـ ... المفروض ماتسمى سلطه لانها وجبه الا شوي بس يميييييييييي ألذ سلطة مكرونه ذقتها ~ المقاديـر ... مكرونه صغار مسلوقه بمويه وملح وشوي زيت بصل اخضر مقطع صغار جزر مبشور ذره شبت للزينه ~ مقاديـر الدريسنـق ... علبة زبادي 4 م ك مايونيز عصير ليمونه فص ثوم مهروس ملح - خل - كمون - زيت زيتون نعناع ناشف ~ الطريقهـ ... اخلطي مقادير الدريسنق سوا واذا حسيتيها ثقيله ممكن تزيدينها شوي حليب سايل يخففها بعد ماتنسلق المكرونه وتصفينها من المويه حطي عليها شوي من الدريسنق وقلبيهم مع بعض واتركيها تبرد شوي ... بصحن التقديم وقبل التقديم طوالي لاتخلينها تتأخر حطي الطبقات :: بصل اخضر مكرونه جزر مبشور ذره الدريسنق وزينيها بالشبت وبالعااااااافيهـ ,,,,,, ~ سلطـة الفصول الاربعهـ ... سميتها بهالاسم لانه فيها تجمع لنكهات واشكال كثيره - - بس من جد طعمها قااااتل وغريب ~ المقاديـر ... خس أمريكي - واذا ماتوفر استخدمي العادي - باذنجان مقطع مكعبات ومقلي ذره فاصوليا حمراء فلفل بارد ملون جبن حلوم ~ الدريسنـق الخرااااافـي ... بصل طماطم فلفل بارد متبل خل البلسميك - انتبهي مو خل البلسميك لحاله - وهذي صورته :: ~ الطريقهـ ... ابدأي اولا بالدريسنق ،، قطعي البصل والطماطم والفلفل البارد صغار مرررره ،، وحطيهم بعلبه وحطي عليهم علبة متبل البلسميك وسكري العلبه زين ورجيهم .. واتركيهم سوا يتنقعون وكلما طول كان اطعم :: - مره ماكان عندي المتبل فحطيت عليهم ليمون وزيت زيتون وخل بلسميك وملح وخل عادي ونعناع ناشف واوريقانو وثوم مهروس واعطى نتيجه خطييييره - بصحن التقديم حطي طبقه من الخس ،، بعدها اخلطي الباذنجان والذره والفاصوليا الحمرا وحطيهم عالخس ،، بعدين قطعي الفلفل الملون حسب رغبتك وحطيهم عالاطراف :: بعدين رشي الدريسنق اللي صلحتيه كله فوقهم وبالاخير قطعي جبن حلوم او فيتا صغار ورشيهم عالوجه .. وبالعااااااافيهـ ,,,,,, ~ التبولـهـ المحمـرهـ مين منا مايحب التبوله ؟؟ بس بعد مين ماملَ منها وحب يغير فيها ؟؟ من عرفت لهالسلطه من ثلاث سنين وانا مدمنتها بقووووه وان شاء الله تعجبكم ~ المقاديـر ... كوب ونصف برغل دبس رمان بصل مفروم فلفل بارد مفروم صلصة طماطم ثوم مهروس بصل اخضر مفروم 3 حبات طماطم مقطعه صغار نعناع طازج مفروم بقدونس مفروم ~ الطريقهـ ... اغسلي البرغل ونقعيه بمويه تقريبا ربع ساعه تكفيه ... احمسي عالنار البصل المفروم مع زيت زيتون - وكثري من الزيت - الين مايصير شفاف بعدين اضيفي عليه : الفلفل البارد + 2 م ك صلصة طماطم وقلبيهم عالنار سوا .. اضيفي عليهم البرغل وحركيهم بعد كذا اضيفي 3 م ك دبس رمان + ثوم مهروس + بهارات + ملح وقلبيهم على النار حتى ينضج البرغل - لاتكون النار عاليه حتى لايحترق - لما يستوي ارفعيه من عالنار واتركيه الين مايبرد تماما .. اخلطي : البصل الاخضر والطماطم والنعناع والبقدونس .. اضيفي عليهم البرغل المحمر وتبليها مثل التبوله العاديه .. بملح وليمون وخل وزيت زيتون وقدميها وبالعافيهـ ,,,,,, مازال حظر التجول مستمرا

[نـξـومـღ]

~ صينيـة الأرز بالشعيريـهـ ... حركه حلوه في المناسبات كتغيير عن انواع الرز المعتاده ومافيه داعي احكي عن الطعم ~ المقاديـر الرئيسيهـ ... بصل مقطع اجنحه جزر مقطع شرائح رفيعه او مبشور بازاليا - حسب الرغبه - كرات الشعيريه رز <== احلفي دجاج مقطع ارباع صنوبر مقلي للزينه ~ الطريقهـ ... نبدأ اولا بخلطة الشعيريه : -وهذي تقدرين تسوين منها كميه كبيره وتفرزنينها ومتى ما احتجتي طلعيها قبل بوقت وخليها تذوب وارجعي احمسيها عالنار شوي وحطيها عالرز - سخني شوي زيت بقدر وكسري عليه كور الشعيريه واحمسيهم حتى يحمرون بعدين صبي عليهم مويه - بس لا تكثرين كلما احتجتي ماء زيدي - واملحيهم واتركيهم حتى يستوون وتنشف المويه .. احمسي البصل عالنار وبعدين اضيفي عليه الجزر والبزاليا وقلبيهم وبعدها اضيفي الشعيريه والله الله بالبهارات لانه هي اللي تعطيها الطعم والملح طبعا والفلفل الاسود وخليهم على نار هاديه يتسبكون سوا وخلصنا منهم ... الدجـاج : بعد ماتقطعينه وتغسلينه اسلقيه بمويه وملح بعدين طلعيه من مويته وصفيه بصينيه وتبليه بـ : صلصة طماطم + زيت + عصير ليمونه + ثوم + ملح + بهارات وقصدريه ودخليه الفرن خليه يمكن نصف ساعه على حرارة 350 وبعدها حمريه من فوق وخلصنا منه :: نجي للرز :: طريقتي المعتاده فيه واللي تخليه نثري وفيه لمعه وكل حبه لحالها هو انه بعد ماتغسلينه وتنقعينه حطي زيت - ولو بتحطين معاه سمن بيكون ألذ - في قدر وحطي عليه بهارات عدله مو مطحونه : فلفل اسود وقرنفل وقرفه وهيل ولما يسخن الزيت وتطلع ريحة البهارات حطي عليه الرز واحمسيه بالزيت شوي - بيلزق تحت بس مو مشكله - بعدين صبي عليه موية الدجاج واملحيه - بس لاتنسين ان موية الدجاج اصلا مالحه - واطبخيه زي الرز العادي ،،، نجي الحين للصينيهـ :: اول شي حطي فيها الرز وفوقه شوي من الشعيريه بعدين صفي الدجاج فوقهم وفوقها طبقة رز واخر شي شعيريهـ .. وقصدريها ودخليها الفرن ماراح تطول لانه كل شي مستوي بس حتى تتسبك مع بعضها وتتداخل النكهات ووقت التقديم رشي عليها الصنوبر ،، يمكن تحسونها عاديه بس طعمها خطير خاصه لانزل طعم الدجاج وحموضة تتبيلته عالرز والشعيريه يميييي وبالعاااااافيهـ ,,,,,,, ~ تشـاينيـز نودلـز هذي من الاكلات اللي تعبت وانا اجرب واحوس بهالطرق ابي اوصل للنتيجه اللي فبالي ابيها تكون مثل حقت المطاعم ، نكهة الصويا واضحه وخطيره لين ماطحت بهالطريقه الاجراميه والسهله .... ~ المقاديـر ... فلفل بارد فاصوليا بصل اخضر جزر صدور دجاج من دون عظم نودلز - انا استخدمت الفتوتشيني اللي تجي شرايط مو كور - ~ مقاديـر الصوص ... 2 م ك صلصة طماطم 1 م ص شطة حلواني المطحونه بالزيت شوي مويه 2 م ك صوص صويا حلو 2 م ك صوص صويا مالح وهذي صورتهم :: ~ الطريقهـ ... اسلقي النودلز بمويه وملح وشوي زيت ،،، قطعي الدجاج والخضار لشرائح رفيعه بعدين احمسي الدجاج بشوي زيت لغاية ماينضج وحطي عليه الخضار وقلبيهم وتبليهم بملح وبهارات اخلطي مقادير الصوص سوا وصبيهم عالخضار وقلبي :: وبعدها اضيفي النودلز وخليهم عشر دقايق عالنار سوا يتسبكون وبس ولاااااا اسهل وعند التقديم رشيها بسمسم محمص وبالعاااااافيهـ ,,,,,, ~ صينيـة برجـر الفلفل الرومـي برضه تسطلت عليها وحبيتها كتغيير عن انواع صواني الخضار العاديه اخذت فكرتها من برنامج بالتيلفزيون وغيرت فيها شوي ،، مره لذيذه مع رز ابيض او خبز مفرود ... ~ المقاديـر ... لحم مفروم بصل مفروم بقدونس مفروم بقسماط بيضه كاتشاب صوص الورشستر - اختياري - ملح - فلفل اسود - بابريكا بهارات مشكله فلفل رومي يكون حجمه كبير صلصة بيتزا قشطة خفق جبنة موزاريلا او قشقوان ~ الطريقهـ ... صلحي البرجر بطريقتك المعتاده ، طريقتي نفس اللي نزلتها بموضوع الباربكيو نايت وهي لحم مفروم - ويكون معاه شوي شحم علشان يطريه - اعجنيه مع البصل - شوي بقدونس - بيضه - بقسماط - شوي كاتشاب وصوص الورشستر - الملح والبهارات - طبعا المقادير تعتمد عالكميه اللي تبغينها - بعد ماتعجنينها زين وقبل ماتبدين تشتغلين وحتى تتأكدين من طعمها وكمية الملح قبل لا تتورطين جهزي مقلاتك وحطي فيها زيت وخوذي قطعه صغيره من اللحم شكليها واقليها ماتاخذ دقيقتين وذوقيها وشوفي اذا كانت محتاجه زيادة شي ... قطعي الفلفل البارد حلقات عريضه واحشيه باللحم مثل ماتشوفون بالصوره :: اقليهم بالمقلاة حتى تتحمر من الجهتين - ماراح يستوي اللي جوا بس مو مشكله لانها بتدخل الفرن اهم شي ابغاها تتحمر وتاخذ نكهة القلي - صفيهم بصينية الفرن وحطي بين الفراغات صلصة البيتزا - افضل اللي تكون مصلحه بالبيت لانها اخف قوام من الجاهزه - ودخليها الفرن بدون قصدير على درجة حراره 350 واتركيها لغاية ماتشوفين الصلصة بدت تغلي اتركيهم كذا شوي بعدين صبي عالصلصه شوي قشطة خفق ورجعيها الفرن حتى يتكون صوص ثقيل وخليها 10 دقايق اخر شي قبل لا تطلعينها رشيها بالجبنه وخليها تذوب وقدميها وبالعااااافيهـ ,,,,,,

[نـξـومـღ]

نجي للجزء المفضل عندي ،، الــحـــلى وش الدنيا بلا حلا هالمره يسمحون لي راعيات حلا القهوه لاني مانزلت شي يصلح لهم حلي هالمره كلها بارده تصلح بعد العشاء او للتقديم مع عصير العشق الابدي .. التشيز كيك هذي طريقه جديده مختلفه له ، طعمها غريب كأنه طعم ايس كريم التشيز كيك اللي بباسكن روبنز طريقة تقديمه حلوه وغريبه ، والاروع فيه بالنسبه لي زي ما انتم عارفين اني اكره شي اسمه تقطيع حلا فهذا قدميه بصحونه بلا تعب بلا هم ، وتقدرين تجهزينه من الليله اللي قبل .... ~ المقاديـر ... بالاكواب المعياريهـ ... الكميه تكفي 6 قوالب قصدير ... علبه وربع بسكوت دايجستف او علبة بسكوت شاي 1 م ص سكر بني زيت + ماء علبه ونصف صغيره جبنة فيلادلفيا - ومايصلح تستبدلينها بكيري لانه ثقيل فبيبين طعمه بقوه - ثلثين كوب ساور كريم - كريما حامضه - تجي بعلب زي الزبادي بالثلاجات تحصولنهم من شركة ندى - اذا ماعندك ممكن تستبدلين المقدار بثلث كوب لبنه + ثلث كوب قشطة خفق لكن ماراح تعطيك الطعم نفسه - 1 كوب سكر بودره شوي فانيليا نصف ملعقه صغيره جيلاتين مذوبه بشوووي مويه حاره ست حبات فراوله طازجه زيادة فراوله للتزيين ~ الطريقهـ ... سخني الفرن لـ 350 .. طريقتي دائما ببسكوت التشيز كيك واللي تطلع لذيذه وماتتفتت ولا كأنها حجر قاسيه اخلط كمية البسكوت المذكوره والسكر البني ،، واجيب فنجال الشاي اعبي ثلثينه بالزيت والثلث الباقي مويه واصبه عالبسكوت واخلطهم زين جيبي صحون القصدير الصغار وابدأي عبيهم بالبسكوت واضغطي عالاطراف الين مايتشكل على شكل القالب ورتبي الحوايف زي ماتشوفون :: ودخليهم الفرن من 5 الى 10 دقايق وطلعيهم واتركيهم يبردون ،، - هالخطوه ممكن تسوينها قبل بيومين وبعد مايبرد البسكوت غطيه زين واتركيه بمكان جاف ماراح يتغير - الحشوهـ :: قطعي الفراوله قطع صغيره مره ، ان كانت لينه اهرسيهم بعد التقطيع بالشوكه وان كانت قاسيه حطيهم بخلاط المولينكس الصغير بس ضغطتين علشان تنهرس شوي مو مره تصير مربى انتبهي بالخلاط الكهربائي اليدوي اخلطي : الجبن والساور كريم والسكر والفانيليا لغايه مايختلطون زين بعدين اضيفي الفراوله واخلطي واخيرا الجيلاتين المذوب وبعد ماتتجانس غلفيهم ودخليهم الثلاجه لحد ماتجمد تمام ،،، - هذي الخطوه تقدرين تجهزينها من الليله اللي قبل - قبل التقديم بوقت مايكون طويل جيبي القوالب وجيبي مغرفة الايس كريم وكوب فيه ماء حار وخلطة التشيز وغطي المغرفه بالمويه حتى تسخن واغرفي من التشيز وحطي بالقوالب وزينيهم بالفراوله وادهنيها بشوي مربى مخفف بمويه علشان تلمع وارجعي دخليها الثلاجه تجمد وقدميها وبالعااااافيهـ ,,,,,, ~ آيـس كريـم البسكويتـات حلا اتوقع معروف عند الكثير ، حبيت اقدمه بشكل مختلف شوي جدا لذيييييذ وممكن برضه يتجهز من اليوم اللي قبل ،،، ~ المقاديـر ... 16 حبة كوكيز 10 حبات اوريو نصف علبة بسكوت شاي علبتين قشطه خوذي منهم ملعقتين كبار على جنب 8 حبات جبن كيري نصف علبة نستله كبيره ثلاث حبات مارس 2 م ك قشطه اللي اخذتيها من اللي فوق نصف كوب قشطة خفق 100 جرام شكولاته خام غامقه ~ الطريقهـ ... كسري البسكويتات لقطع صغيره :: اخلطي القشطه والكيري والنستله بالخلاط وصبيهم عالبسكوت وقلبيهم سوا .. ذوبي المارس والقشطه عى حمام مائي حتى يذوب زين ،، في صينيه لا تكون كبيره : حطي نصف مقدار البسكوت بعدين صبي فوقه نصف خلطة المارس - بتلاحظين انها بتجمد بسرعه وتصير زي التوفي الثقيل - بعدين باقي مقدار البسكوت وبعده باقي المارس وغلفيهم زين ودخليهم الثلاجه - هذي الخطوه ممكن تجهز باليوم اللي قبل - قبل التقديم بوقت مو طويل :: جيبي مغرفة الايس كريم << هالموضوع برعاية هالمغرفه ومويه حاره ومثل ماسوينا بالتشيز نسوي هنا ونرتب الكور بصحن التقديم او ممكن بصحون او كاسات فرديه نجهز الحين الجانـاش :: افرمي الشكولاته لقطع صغيره سخني قشطة خفق عالنار الين ماتشوفين اطرافها بدت تغلي شيليها طوالي من النار وحطي عليها الشكولاته وحركي لغاية ماتذوب الشكولاته تماما وصبيها وهي حاره عالكور ودخليهم الثلاجه يبردون وقدميهم وبالعاااااافيهـ ,,,,, ^^ واضح انه وحده بلشت وش تسمي الحلا اكثر حلا معتمدته لبعد العشا وقت المناسبات طعمه يشبه طعم ايس كريم السيارات الطريقه الاصليه انه يتصلح بصينية عاديه ببسكوت شاي عادي تغمسينه بمويه ونسكافيه بس انا ايش ؟؟؟؟ اكرررررره التقطيع << متأكده ماسوا لك شي هالمسكين ؟؟ فصلحت هالطريقه اشيك وارتب ... ~ المقاديـر ... كوكيز او بسكوت دايجستف - يعتمد عالحجم اللي تبغينه 3 أظرف دريم ويب 5 حبات جبن كيري 4 علب قشطة طازجة 1 علبة نستله كبيره 1 فنجال شاي حليب سايل 1 م ص جيلاتين مذوبه بنصف فنجال الشاي مويه حاره مكسرات مجروشه قرفه جاناش نفس طريقة اللي فوق ~ الطريقهـ ... نبدا بتجهيز القوالب ، وافضل انه تجهزينها قبل بكم يوم لما تكونين فاضيه جيبيهم عند التلفزيون واشتغلي << صارت حصة فنيه جيبي القطاعات الدائريه ، لقيت الكبيره على حجم الدايجستف والصغيره على حجم الكوكيز :: قطعي قصدير لقطع مستطيله واثنيه بالنصف علشان يثقل ولفيه عالقطاعه ولصقي الاطراف مثل ماتشوفون بالصوره :: سبق وجربتها بورق زبده ماضبط .. ممكن تقولون ليه هالحوسه ، ليه مانحطها بصينيه ونقطعها بالقطاعات وبلا هالسواليف راح اقولك لك ليه ، لانه الحلا مو مره متماسك فصعب تقطيعه بالقطاعه جيبي البسكوت او الكوكيز - على حسب الحجم اللي انتي راغبته - بس افضل الكوكيز لان الحلا ثقيل شوي ماينفع قطع كبار ،، وادهنيه بشوي حليب سايل او مويه ونسكافيه او حتى عصير برتقال جاهز للناس اللي يحبون الطعم الغريب بس علشان يترطب شوي ، وحطي عليه دوائر القصدير .. اخلطي مقادير الخلطه البيضاء كلها بالعجانه او بالخلاط اليدوي الكهربائي حتى تتجانس وصبيها عالكوكيز وضبطيها من فوق بحيث تكون مستويه ودخليهم الثلاجه يبردون وقت طويل نجي للحشوه اللي فوق ،، ممكن تحطين اي شي ترغبين فيه كل انواع الباي فيلينق تبع التشيز كيك تمشي .. بس بالنسبه لي ألذ حشوه حسيتها ماشيه معاه ومعطيته نكهه جديده انه تجيبين مكسرات مجروشه - انا استخدمت جوز البقان - واخلطيها مع قرفه مطحونه ورشيها عالوجه ،، بعدين صلحي جاناش شكولاته مثل ماسويناه قبل واتركيه يبرد شوي وصبيه فوق المكسرات ورجعي الحلا الثلاجه لغاية وقت التقديم .. لما تقدمينها شيلي القصدير عنها وتذوقي الطعم الرائع وبالعاااااااافيهـ ,,,,,,, واخيـرا اتمنى من قلب قلب قلب قلبي يكون الموضوع اعجبكم وعوض لو جزء بسيط من غيابي وارضى الناس الزعلانين مني ادري انه مو قد المقام ولا قد اللي تبغونه مني بس هذا اللي قدرني ربي عليه حاليا ،، واوعدكم بالجديد والافضل كلما فضيت بإذن الله تقبلـوا خـالص امنياتي للجميع بقضاء عطله حلوهـ وسعيـدهـ

[فلسفة زمن]

يمي يمي

[ديمه]

واو كل طبق احلى واشهى من الثاني

يسلموااا يانعومتنا

لاعدمناك يالغلا

[الملكه 7]

إيه ده دنا بموووووووووووووت ع الشغلات الحلوه ديه
وكمان متبل ايطالي يم يم يم
يعطيك العافيه يااارب

[ضيونه]

مبدعه مبدعه
على هالوصفات االروعه